Առողջապահական ծառայություններ

Առողջության համընդհանուր ապահովագրության համակարգում ընդգրկված ԼՂ փախստականների խմբերը

Պետության կողմից ամբողջությամբ ապահովագրվող ՀՀ ռեզիդենտ փախստականների խմբերը

• մինչև 18 տարեկան երեխաներ 

• 65 և ավելի բարձր տարիքի անձինք 

• հաշմանդամություն ունեցող անձինք 

• առանց ծնողական խնամքի մնացած երիտասարդներ (մինչև 23 կամ ուսանելու դեպքում՝ մինչև 26 տարեկան) 

• զոհված զինծառայողների ընտանիքների անդամներ 

• հաշմանդամություն ունեցող երեխայի ծնողներից մեկը (կամ խնամակալը) 

• անապահովության գնահատման համակարգում ընդգրկված ընտանիքների անդամներ 

• բռնադատված անձինք 

• Չեռնոբիլի վթարի հետևանքների վերացման աշխատանքների մասնակիցներ 

• Հայրենական մեծ պատերազմի վետերաններ և նրանց հավասարեցված անձինք, 

• Հաշմանդամության զինվորական կենսաթոշակ ստացող նախկին զինծառայողներ 

ՈՒՇԱԴՐՈՒԹՅՈՒՆ․ Եթե դու վերոնշյալ խմբերից որևէ մեկին չես պատկանում ու չես աշխատում (չունես գրանցված աշխատավարձ կամ այլ եկամուտ կամ չես զբաղվում ձեռներեցությամբ), չես կարող ընդգրկվել առողջության համընդհանուր ապահովագրության համակարգում, բայց կարող ես օգտվել ԼՂ-ի փախստականներին հասանելի անվճար բուժօգնությունից։ Մանրամասները տես Անվճար և արտոնյալ պայմաններով ծառայությունները և դրանց տրամադրման կարգը բաժնում։

ՈՒՇԱԴՐՈՒԹՅՈՒՆ․ աշխատող, ինչպես նաև ձեռներեցությամբ զբաղվող փախստականների առողջության համընդհանուր ապահովագրության մանրամասները ներկայացված են հետևյալ տեսանյութում:

Առողջության համընդհանուր ապահովագրությունից օգտվելու կարգը

Առողջության համընդհանուր ապահովագրությունից օգտվելու համար առաջին քայլով գրանցվիր քեզ համար նախընտրելի պոլիկլինիկայում թերապևտի կամ ընտանեկան բժշկի մոտ, ակտիվացրու տեղում տրամադրված վկայագիրը ArMED eHealth հավելվածում, այնուհետ անցիր պարտադիր բժշկական կանխարգելիչ զննում։ Նեղ մասնագիտական աջակցության կամ հետազոտությունների անհրաժեշտության դեպքում թերապևտը քեզ կտրամադրի ուղեգիր, որով դու կարող ես բուժօգնություն ստանալ համակարգի գործընկեր բժշկական կենտրոններում, նախընտրելի մասնագետի մոտ։

Որպեսզի տեղեկանաս առողջության համընդհանուր ապահովագրության շրջանակում քեզ հասանելի բժշկական ծառայությունների, բուժհաստատությունների և դեղամիջոցների մասին, պետք է գրանցվես ArMed eHealth հավելվածում։ Հավելվածում կարող են գրանցվել 16  և բարձր տարիքի  անձինք: Մինչև 16 տարեկան անձանց տվյալները հասանելի են նույն հավելվածի՝ ծնողի հետ «Կապակցված անձինք» բաժնում։

Եթե դեռ գրանցված չես ArMed eHealth հավելվածում, այս տեսանյութը կօգնի քեզ այդ հարցում։

20-40 տարեկան փախստական անզավակ կանանց վերարտադրողականության օժանդակ տեխնոլոգիաներով մատուցվող ծառայություններ

Ծրագրի շահառուները

1) 2 տարի և ավելի անպտղություն ունեցող (բացարձակ ցուցումների դեպքում՝ առանց 2 տարվա սահմանափակման)՝ ԼՂ-ից տեղահանված, փախստականի կարգավիճակ ունեցող անզավակ կանայք, ովքեր պատկանում են 20-40 (ներառյալ) տարիքային խմբին

2) 28-42 (ներառյալ) տարեկան ԼՂ-ից տեղահանված, փախստականի կարգավիճակ ունեցող անզավակ կանայք

3) մեկ երեխա ունեցող` ԼՂ-ից տեղահանված, փախստականի կարգավիճակ ունեցող և գրանցված ամուսնության մեջ գտնվող 2 տարի և ավելի երկրորդային անպտղության ցուցմամբ զույգերը, որոնցից կինը պատկանում է 20-36 (ներառյալ) տարիքային խմբին,

4) զինծառայության ընթացքում կամ դրա ավարտից հետո զինծառայության/պատերազմական գործողությունների ընթացքում զոհված (մահացած) որդու` ԼՂ-ից տեղահանված, փախստականի կարգավիճակ ունեցող ծնողները։ Կնոջ տարիքը սահմանվում է մինչև 42 տարեկանը։

Անհրաժեշտ փաստաթղթերի ցանկ

• դիմում՝ համապատասխան ձևաչափով (ձևը տրամադրվում է տեղում)

• գրանցված ամուսնության մեջ գտնվելու դեպքում` այդ փաստը հաստատող փաստաթուղթ

• կնոջ և/կամ ամուսնու՝ անձը հաստատող փաստաթղթեր (անձնագիր կամ նույնականացման քարտ)

• զոհված կամ դատական կարգով բացակայող ճանաչված զինծառայողների ծնողների դեպքում` դիմումատուի կարգավիճակը հավաստող փաստաթղթեր  

• էպիկրիզ` նախկինում կիրառված հետազոտման մեթոդների ու վերարտադրողականության օժանդակ տեխնոլոգիաների կիրառման մասին` առկայության դեպքում

Ծրագրին դիմելու կարգը և պայմանները

Ծրագրի շրջանակում վերարտադրողականության օժանդակ տեխնոլոգիաներից օգտվելու համար շահառուն պետք է դիմի ՀՀ առողջապահության նախարարության հետ  պայմանագիր ունեցող հետևյալ բժշկական կազմակերպություններին՝ իր ընտրությամբ՝

1. «Մոր և մանկան առողջության պահպանման գիտահետազոտական ինստիտուտ» ՓԲԸ

2. «Վերարտադրողական առողջության, պերինատոլոգիայի, մանկաբարձության գինեկոլոգիայի հանրապետական ինստիտուտ» ՓԲԸ

3. «Շենգավիթ բժշկական կենտրոն» ՓԲԸ

4. «Նատալի Ֆարմ» ՍՊԸ-ի «Աստղիկ» բժշկական կենտրոն

5. «Ֆերթիլիթի սենթր» ՍՊԸ

6. «Վիտրոմեդ» վերարտադրողական առողջության կենտրոն

7. «Այ Վի Էֆ լայֆ» վերարտադրողական կենտրոն

Դիմումի ընթացքը

Դիմումը ներկայացվում է բժշկական կազմակերպությունում։ Բժշկական կազմակերպության հանձնաժողովն ուսումնասիրում է փաստաթղթերը և առավելագույնը 20 օրվա ընթացքում տրամադրում կամ մերժում է դիմումը: Դիմումի մերժման դեպքում դիմումատուն չի զրկվում կրկին դիմելու իրավունքից (մերժման հիմքերի վերացման դեպքում):