Բնակարանային ապահովման պետական աջակցության ծրագիր ԼՂ-ի փախստականների համար

Ծրագրի շահառուներն ու հիմնական պայմանները

Ծրագրի շահառուները

Ծրագրի շահառու կարող է լինել 2020 թ․ սեպտեմբերի 27-ի և 2023թ․ սեպտեմբերի 19-ի պատերազմական գործողությունների արդյունքում ԼՂ-ից տեղահանված և ՀՀ-ում փաստացի բնակվող ընտանիքը (նաև միայնակ չափահաս անձը), որի բոլոր անդամները, այդ թվում, անչափահասները, ունեն ՀՀ քաղաքացիություն։ Ծրագրի իմաստով ընտանիքը ծրագրին դիմելու օրվա դրությամբ գրանցված ամուսնության մեջ գտնվող ամուսիններից, այդ թվում, միայնակ ծնողից, նրանց՝ 2023 թվականի սեպտեմբերի 19-ի դրությամբ 18 տարին չլրացած երեխաներից, ինչպես նաև ցանկացած այլ անդամից բաղկացած միավորն է։ Եթե ընտանիքի անդամը չափահաս է դարձել 2023 թ․ սեպտեմբերի 19-ից հետո, ապա նա կարող է առանձին դիմել ծրագրին։

Ընտանիքի կազմի մեջ, բացի ընտանիքի անմիջական անդամներից, կարող են ներառվել դիմողի չամուսնացած քույրերն ու եղբայրները, ծնողները, տատիկները, պապիկները: Ընտանիքի անդամ են համարվում նաև մինչև 2026 թ․ դեկտեմբերի 31-ը ներառյալ ծնված երեխաները՝ անկախ այն հանգամանքից, թե ընտանիքը երբ է ներկայացրել ծրագրի դիմում-հայտը և ստացել հավաստագիրը։

Եթե դիմող ընտանիքի ամուսնալուծված անդամը դիմելու պահին ունի անչափահաս երեխա, ապա երեխան համարվում է այն ծնողի ընտանիքի պարտադիր անդամը, ում հետ դատարանի որոշմամբ ապրում է։ Եթե նման որոշում չկա, երեխան համարվում է մոր ընտանիքի անդամը, իսկ հայրը կարող է ընդգրկվել դիմում-հայտարարությունում առանց երեխայի։

Հիշեցում․ ՀՀ քաղաքացիություն ստանալու դիմումներն ընդունվում են բացառապես օնլայն տարբերակով՝ mcs-citizenship.am հարթակում։ Դիմումի լրացման ձևին ծանոթացիր այստեղ։

ՈՒՇԱԴՐՈՒԹՅՈՒՆ․ տեղահանված ընտանիքը շահառու չէ, եթե՝

• ԼՂ առանձին շրջաններից տեղահանված ընտանիքների համար բնակարանային ապահովման պետական աջակցության ծրագրի շահառու է՝ անկախ հավաստագրով տուն գնած կամ չգնած լինելու հանգամանքից

• ընտանիքի անդամներից առնվազն մեկը 2023 թ սեպտեմբերի 19-ի կամ դիմելու օրվա դրությամբ ՀՀ-ում ունի սեփականության իրավունքով բնակարան կամ բնակելի տուն 50 % և ավելի մասնաբաժնով։

Ծրագրով աջակցություն ստանալու տարբերակները

ԼՂ-ի փախստական ընտանիքների բնակարանային ապահովման պետական աջակցության ծրագրով դու կարող ես՝

• գնել բնակարան կամ տուն

• կառուցել անհատական բնակելի տուն

• օգտվել գործող հիփոթեքային վարկի մարման աջակցությունից

Բոլոր երեք եղանակներով ծրագրից օգտվելու համար պետք է լրացնես համապատասխան դիմում-հայտ ու ստանաս հավաստագիր, որից հետո միայն կարող ես իրացնել այն՝ նախատեսված գումարի չափով։ Ծրագրով տրամադրվող հավաստագրի գումարի չափը սահմանվում է ընտանիքի յուրաքանչյուր անդամի համար առանձին և կախված է այն բնակավայրից, որտեղ որոշել ես տուն/բնակարան գնել կամ կառուցել։

Ծրագրով բնակարան/տուն ձեռք բերելու հիմնական պայմանները

• ձեռքբերվող (կառուցվող) տան բնակմակերեսը ընտանիքի 1 անդամի հաշվով չպետք է լինի 9 քմ-ից պակաս

• ձեռքբերվող (կառուցվող) տան արժեքը չի կարող գերազանցել 55 մլն դրամը

• հավաստագրով քեզ տրամադրվող գումարը համարվում է հիպոթեքային վարկ, որի մայր գումարն ու տոկոսագումարները վճարում է ՀՀ կառավարությունը։ Վարկի ժամկետը՝ 10 տարի, տոկոսադրույքը՝ 13%, հավաստագրի գումարի 20%-ը կառավարությունն ուղղում է քո կողմից ձեռքբերվող բնակարանի/տան կանխավճարին

• հավաստագրով ձեռք բերված գույքի սեփականության իրավունքը պատկանում է հավաստագրի մեջ նշված բոլոր չափահաս անձանց

• հավաստագրով ձեռք բերված գույքը կարող ես տրամադրել վարձակալության հիմունքներով, բայց վաճառել չես կարող մինչև վարկի գործողության ժամկետի ավարտը

  ՈՒՇԱԴՐՈՒԹՅՈՒՆ․ ծրագրով տրամադրվող ֆինանսական աջակցությունը չի կարող արգելադրվել, բռնագանձվել կամ հաշվանցվել շահառուի այլ պարտավորությունների դիմաց (օրինակ՝ Հարկադիր կատարումն ապահովող ծառայության նկատմամբ պարտքեր, ժամկետանց վարկային պարտավորություններ և այլն)

Անհատական բնակելի տուն կառուցելու պայմանները

Եթե նախատեսում ես ոչ թե պատրաստի բնակարան կամ տուն ձեռք բերել, այլ կառուցել ,ապա կարող ես օգտվել ծրագրի ՝«Անհատական բնակելի տան կառուցում» բաղադրիչից, որի պայմանները հետևյալն են՝

• տան կառուցապատումն արվում է ծրագրի կողմից հաստատված կառուցապատման տիպային նախագծերից որևէ մեկով։ Դիմումը լրացնելու պահին տիպային նախագծի ընտրությունը պարտադիր է, իսկ հավասատգիրն իրացնելու ընթացքում դու կարող ես տունը կառուցել նաև ՀՀ քաղաքաշինության նախարարության կողմից հաստատված ցանկացած նախագծով։ Տիպային նախագծերի ցանկին կարող ես ծանոթանալ այստեղ:

• հավաստագրին համարժեք գումարից մինչև 4 միլիոն դրամը թույլատվում է օգտագործել հողամաս ձեռք բերելու նպատակով

• հողամաս կարող ես ձեռք բերել նաև հավելյալ հիփոթեքային վարկով

• ծրագրի գործընկեր բանկի կողմից տրամադրվող կառուցապատման վարկը կարող ես օգտագործել միայն ծրագրի շրջանակում հավաստագրով ձեռք բերված տվյալ հողամասում տուն կառուցելու համար

• հավաստագիրը չես կարող օգտագործել կիսակառույց բնակելի շինություն գնելու և կառուցապատելու նպատակով։

• Այս բաղադրիչից օգտվելու համար առաջին քայլով այցելիր https://housing.socservice.am/ և ընտիր ՝«Անհատական բնակելի տան կառուցում» բաղադրիչը։ Հետևելով հրահանգներին՝ լրացրու պահանջող տվյալները և ստացիր հավաստագիրը։ Այցելիր ծրագրի գործընկեր նախընտրելի բանկ, ընտրիր անշարժ գույքի գնահատում իրականացնող կազմակերպություններից մեկը և պատվիրիր հողամասի գնահատումը։ Կազմակերպությունը գործընթացն ավարտելուց հետո քեզ կտրամադրի անշարժ գույքի գնահատման հաշվետվություն։ Եթե հողամասը ձեռք ես բերելու հիփոթեքային վարկավորմամբ, ապա այն գնահատելուց հետո քայլերի հաջորդականությունը կցուցի բանկը։

Եթե հողամասի ձեռքբերման համար նախատեսում ես օգտագործել քո հավաստագրի գումարի 4 մլն-ը, ապա պետք է ձեռքի տակ ունենաս հետևյալ փաստաթղթերն ու տվալները՝

• վաճառողի հետ կնքված հողամասի առուվաճառքի տարաժամկետ պայմանագիր, որով նախատեսվում է, որ հողամասի համար կվճարես ավելի ուշ (պայմանագիրը կազմելուց առաջ խորհրդակցիր իրավաբանի հետ)

• ձեռք բերվող հողամասի արժեքը

• գնահատող կազմակերպությունից տրված՝ հողամասի գնահատման հաշվետվությունը

• վաճառողի անունը, ազգանունը, բանկային հաշվեհամարը

• հողամասի սեփականության վկայականը

• հողամասի պաշտոնական հասցեն՝ բոլոր մանրամասներով

• Այս բոլոր փաստաթղթերն ու տվյալները հավաքելուց հետո կրկին այցելիր https://housing.socservice.am/ հարթակ, ընտիր «Անհատական բնակելի տան կառուցում» բաղադրիչը, բացված պատուհանի վերևի աջ մասում սեղմիր «Հողամասի ձեռքբերում» կոճակը և լրացրու պահանջվող տվյալները, կցիր անհրաժեշտ փաստաթղթերը։

Դիմում հայտը ստանալուց հետո 7 աշխատանքային օրվա ընթացքում պայմանագրով նախատեսված գումարը կփոխանցի վաճառողի բանկային հաշվին՝ այդ մասին քեզ տեղեկացնելով էլեկտրոնային փոստով։

ՈւՇԱԴՐՈՒԹՅՈՒՆ․ դու կարող ես օգտվել հողամասի ձեռքբերման համար նախատեսված աջակցությունից, եթե հավաստագրով քեզ հասանելիք աջակցության չափի և հողամասի արժեքի տարբերությունը պակաս չէ հասանելիք աջակցության չափի 80 տոկոսից։ Օրինակ,  հավասատագրով քեզ հասանելիք գումարը կազմում է 16 մլն ՀՀ դրամ, դրանից 4 մլն-ը պայմանականորեն հատկացնենք հողամասի ձեռքբերմանը, մնացորդը կկազմի 12 մլն ՀՀ դրամ։ Իսկ հավաստագրով քեզ հասանելիք գումարի, այսինքն, 16 մլն-ի 80 %-ը կազմում է 12,8 մլն։ Հետևաբար, բերված օրինակի պարագայում, դու չես կարող հավաստագրի գումարի 4 մլն-ը հատկացնել հողամասի ձեռքբերմանը։

Թվերը պայմանական են, կարող ես կիրառել հետևյալ բանաձևը՝ քո հավաստագրին համարժեք գումարին համապատասխան՝

Ա - ՀԱ > Ա × 80/100

Ա-աջակցության ընդհանուր գումար, ՀԱ - հողամասի արժեք։

Աջակցության չափը՝ մեկ անձի հաշվով

Հավաստագրի չափը՝ մեկ անձի հաշվով կազմում է․  

• 3 մլն դրամ՝ Երևան քաղաքում, բացի 1-ին և 2-րդ գոտիներից: Երևան քաղաքի 1-ին և 2-րդ գոտիների ցանկը կարող ես գտնել այս հղումով՝ https://www.arlis.am/hy/acts/136421

• 5 մլն դրամ՝ ՀՀ հետևյալ 242 բնակավայրում տուն գնելու/կառուցելու դեպքում (Ցանկ 1) 

• 4 մլն դրամ վերոնշյալ 242 բնակավայրերից և Երևան քաղաքից բացի ՀՀ մյուս բոլոր մարզային բնակավայրերում տուն գնելու/կառուցելու դեպքում

• 2 մլն դրամ՝ եթե 2024 թ. մայիսի 16-ի դրությամբ ունեք գործող հիփոթեքային վարկ (բացի Երևանի 1-ին և 2-րդ գոտիներում ձեռք բերված գույքի)

• 3 մլն դրամ՝ եթե ձեր հիփոթեքը ձևակերպվել է 2024 թ. մայիսի 16-ից մինչև 2025 թ. հուլիսի 1-ը ներառյալ (բացի Երևանի 1-ին և 2-րդ գոտիներում ձեռք բերված գույքի)

Ծրագրի գործընկեր բանկերը

ԼՂ-ի փախստական ընտանիքներին բնակարանային ապահովման պետական աջակցության ծրագրի շրջանակում համագործակցող բանկերն են՝

«Ամերիաբանկ» ՓԲԸ

 «Էվոկաբանկ» ՓԲԸ

 «Յունիբանկ» ԲԲԸ

«Ֆասթ բանկ» ՓԲԸ

 «Հայէկոնոմբանկ» ԲԲԸ

«Կոնվերսբանկ» ՓԲԸ

«ԱՄԻՕ» ՓԲԸ

Ինչպե՞ս դիմել ծրագրին