Բնակվարձի մասնակի փոխհատուցման պետական ծրագիր ԼՂ-ի փախստականների՝ փոքր կազմով ընտանիքների համար

Ծրագրի շահառուները և աջակցության չափը

Ծրագրի շահառու կարող է լինել 1-3 անդամ ունեցող այն փոքր ընտանիքը, որի անդամները՝

• ունեն 1-ին կամ 2-րդ խմբի անժամկետ հաշմանդամություն, կամ խորը/ծանր ֆունկցիոնալ սահմանափակում, կամ 60 և ավելի տարեկան են,

• անդամների տարիքների հանրագումարը 115 և ավելի է՝ 2 անդամի դեպքում

• անդամների տարիքների հանրագումարը 175 և ավելի է՝ 3 անդամի դեպքում

Սույն ծրագրի շրջանակում աջակցության ամսական չափը ընտանիքի յուրաքանչյուր անդամի համար կազմում է 40․000 ՀՀ դրամ և տրամադրվում է 120 ամիսների ընթացքում։

Որո՞նք են ծրագրի պայմանները

Ծրագրով առաջարկվող աջակցությունից կարող ես օգտվել, եթե

• քո ընտանիքի բոլոր անդամներն ունեն ՀՀ քաղաքացիություն (ՀՀ քաղաքացիություն ստանալու համար մուտք գործեք mcs-citizenship.am հարթակ և լրացրեք օնլայն դիմում)

• քո ընտանիքի որևէ անդամ ԼՂ-ից տեղահանվածների բնակարանային ապահովման ծրագրի շրջանակում հավաստագիր չի ստացել կամ չեղարկել է արդեն ստացված հավաստագիրը:

• քո ընտանիքի առնվազն մեկ անդամը 2023թ․ սեպտեմբերի 19-ի կամ դիմելու օրվա դրությամբ չունի սեփականության իրավունքով բնակարան/բնակելի տուն 50%-ից ավելի մասնաբաժնով կամ յուրաքանչյուր անդամի հաշվով բնակելի մակերեսը չի գերազացնում12 քմ-ն։

Ինչպե՞ս դիմել ծրագրին

Այս ծրագրի շրջանակում տրամադրվող աջակցությունից օգտվելու համար մինչև 2027-ի դեկտեմբերի 31-ը պետք է լրացնես էլեկտրոնային դիմում՝ https://housing.socservice.am/ հարթակում՝ ընտրելով «Առանձին խմբերի ընտանիքներին կացարանով ապահովման համար վարձակալության վարձավճարի մասնակի փոխհատուցում» տարբերակը՝ տրամադրելով հետևյալ իմֆորմացիան․

• քո և ընտանիքի անդամների տվյալները՝ անուն, ազգանուն, հայրանուն, անձը հաստատող փաստաթուղթ կամ Հանրային ծառայությունների համարանիշ (ՀԾՀ)

• էլեկտրոնային փոստի հասցե և բջջային հեռախոսահամար

• Փաստացի բնակության հասցեն (որտեղ բնակվում եք վարձակալությամբ)

• Բանկային հաշվի տվյալներ՝ կից վճարային քարտի համարը և բանկի անունը

• Կացարանի վարձատուի անուն, ազգանուն և հարկ վճարողի հաշվառման համարը

Եթե քո տրամադրած բոլոր տվյալները համապատասխանեն ծրագրի պահանջներին, դիմումը կհաստատվի, և գումարը կփոխանցվի քո բանկային քարտին։

Ո՞ր պարագայում կարող է մերժվել կամ դադարել աջակցությունը

Աջակցության տրամադրումը կարող է մերժվել կամ դադարեցվել, եթե

• Քո կողմից ներկայացված տվյալները չեն համապատասխանում պետական ռեգիստրում առկա տվյալներին

• դու կամ քո ընտանիքի անդամը 90 և ավելի օր անընդմեջ բացակայել է Հայաստանի Հանրապետությունից։ Ընդ որում, այս դեպքում՝ աջակցության տրամադրումը շարունակվում է անձի՝ ՀՀ վերադառնալու ամսվան հաջորդող ամսվանից։ Բայց եթե դու քո ընտանիք անդամը ՀՀ-ից բացակայել եք 183 և ավելի օր անընդմեջ, ապա վերադառնալուց հետո այլևս չեք կարող դիմել աջակցությունը ստանալու համար

• քո ընտանիքի անդամի մահվան պետական գրանցման վերաբերյալ տվյալներն առկա են Քաղաքացիական կացության ակտերի գրանցման գրասենյակի (ՔԿԱԳ) կենտրոններից ստացված տվյալներում: Նկատի ունեցիր՝ եթե աջակցությունը ստանալու ընթացքում դիմողը մահացել է, ապա ընտանիքիդ մյուս անդամներից մեկը կարող է խմբագրել դիմումը՝ որպես դիմող նշելով իր տվյալները և շարունակել ստանալ աջակցությունը

• եթե քո ընտանիքի անդամի համար արդեն առկա է հաստատված դիմում

• եթե ՀՀ պետական եկամուտների կոմիտեից ստացված տեղեկատվության համաձայն՝ չի հաստատվել վարձատուի հարկատու լինելու հանգամանքը

• եթե դու չես ներկայացրել սույն կարգի 3-րդ կետով նախատեսված բոլոր տվյալները։