ԼՂ-ի փախստական ուսանողների ուսման վարձի փոխհատուցման ծրագիր

Ո՞վ է ծրագրի շահառուն

Ուսման վարձի փոխհատուցման պետական ծրագրի շահառուներն են 2023 թվականի սեպտեմբերի 19-ից հետո ԼՂ-ից տեղահանված այն ուսանողները, որոնք՝

• 2023 թվականի սեպտեմբերի 19-ի դրությամբ սովորում էին ԼՂ-ում նախնական (արհեստագործական), միջին, բարձրագույն և հետբուհական մասնագիտական կրթական ծրագրեր իրականացնող ուսումնական հաստատություններում, իսկ տեղահանությունից հետո համապատասխան կարգով հրամանագրվել են ՀՀ պետական ուսումնական հաստատություններ

• 2024-2025, 2024-2025, 2025-2026 ուսումնական տարում ընդունվել և սովորում են ՀՀ նախնական (արհեստագործական), միջին, բարձրագույն և հետբուհական մասնագիտական կրթական ծրագրեր իրականացնող պետական ուսումնական հաստատություններում

Փոխհատուցման պայմանները և աջակցության չափը

Ծրագրի շրջանակներում տրամադրվում է ուսման վարձի 100%-ի չափով փոխհատուցում, եթե դու հաղթահարել ես ՄՈԳ-ի համապատասխան շեմը։ Մանրամասներին ծանոթացիր ստորև.

• 2023 թվականի սեպտեմբերի 19-ի դրությամբ ՀՀ նախնական (արհեստագործական), միջին, բարձրագույն և հետբուհական մասնագիտական կրթական ծրագրեր իրականացնող ուսումնական հաստատություններում ընդունված և սովորող տեղահանված ուսանողները ստանում են փոխհատուցում, եթե տարեկան կտրվածքով պահպանում են միջին որակական գնահատականի (ՄՈԳ) 75%-ը շեմը

• 2023-2024, 2024-2025, 2025-2026 ուսումնական տարիներին ընդունված տեղահանված ուսանողները 1-ին կիսամյակը սովորում են անվճար, հաջորդ կիսամյակների համար փոխհատուցումը տրամադրվում է ամեն նախորդ կիսամյակի միջին որակական գնահատականի (ՄՈԳ) 75%  շեմը հաղթահարելու դեպքում։ Նախնական (արհեստագործական) և միջին մասնագիտական ուսումնական հաստատություններում, որտեղ ներդրված չէ ՄՈԳ-ի համակարգ, նախորդ կիսամյակի գնահատականների առնվազն 50%-ը պետք է լինի «լավ» կամ «գերազանց»։

• Ծրագրի պայմաններին բավարարելու պարագայում ուսանողը շարունակում է աջակցությունը ստանալ մինչև տվյալ կրթական մակարդակում ուսումնառության ավարտը

Դիմելու կարգը և անհրաժեշտ փաստթղթերը

Ծրագրին դիմելու համար Փախստականի վկայականով կարող ես դիմել քո կրթական հաստատության դեկանատ։ Փախստականի վկայականի առկայությունը պարտադիր է նույնիսկ այն պարագայում, երբ արդեն ՀՀ քաղաքացի ես։ 

Փախստականի վկայականը կորցրած լինելու դեպքում դեկանատին պիտի տրամադրես համապատասխան տեղեկանք ՀՀ աշխատանքի և սոցիալական հարցերի նախարարությունից առ այն, որ դու ԼՂ-ից տեղահանված անձ ես, ու քո տվյալներն առկա են տեղահանվածների տվյալների շտեմարանում։ Տեղեկանքն ուսումնասիրելուց հետո աջակցությունը կհաստատվի և կփոխանցվի անմիջապես կրթական հաստատության հաշվեհամարին։

Ո՞ր դեպքերում չի տրամադրվում աջակցությունը

Փոխհատուցումը չի տրամադրվում, եթե դու

• տեղափոխվել ես այլ ուսումնական հաստատություն՝ փոխելով կրթական ծրագիրը

• փոխել ես կրթական ծրագիրը

• առկա ուսուցման համակարգից տեղափոխվել ես հեռակա ուսուցման համակարգ՝ փոխելով կրթական ծրագիրը

• չես հաղթահարել միջին որակական գնահատականի (ՄՈԳ) 75 % շեմը

• ուսման վարձի ամբողջական փոխհատուցում ես ստանում այլ իրավաբանական կամ ֆիզիկական անձից

• հեռացվել ես ուսումնական հաստատությունից